Xermánicu- Ganador XI concurso «La Voz del barrio»

XERMÁNICU

Nun tenía recuerdos de vivir n’aquel espaciu. Caltuvo l’aliendu col envís de concentrase y rebuscar nos requexos de la mente. Nada. Nin un solu recuerdu d’esi sitiu. Escucó nos rostros que taban con él n’aquella sala pero ningunu-y dixo nada más allá de la franxa d’edá coincidente con la su quinta. Sacó’l móvil pa mirar la hora col xestu yá típicu nesta sociedá cuando unu nun sabe que faer coles manes y al atisbar la marca’l teléfonu, “Samsung”, alcordóse de daqué rellacionáu con un nome. Nun yera un nome nacionaliegu nin tampoco un nome d’esos fáciles d’alcordase. Tenía un dexe xermánicu, col llargor y el rigor que tienen esos vocablos que paecen fechos pa soníos guturales de peli de terror. Tuvo dando-y vueltes hasta qu’una paisana vistía con una bata blanca asomó pola puerta acristalada col dichosu nome escritu n’ella: “Unidá del Alhzeimer”.